“Azərenerji” altı modul elektrik stansiyasında 256 MVt “itirilmiş” gücü bərpa edib.

Bu barədə Bakunews.media-a “Azərenerji” ASC-dən məlumat verilib.

Bildirilib ki, “Azərenerji” ölkənin istilik və su elektrik stansiyaları ilə yanaşı, altı ədəd modul tipli elektrik stansiyasında yenidənqurma və təmir işləri həyata keçirərək, “itirilmiş” güclərin bərpası istiqamətində ciddi irəliləyişlərə nail olub.

Belə ki, 2018-ci ilin payızında qəbul edilən “Reabilitasiya Proqramı”na qədər altı modul tipli elektrik stansiyasında ümumilikdə mövcud olan 72 aqreqatdan 12 ədədi ümumiyyətlə işləmirdi, digər aqreqatlar isə kəsirlə işləyirdi. Məhz işləməyən 12 aqreqatın yenilənməsi və əsas ehtiyat hissələrinin xarici ölkələrdən gətirilərək dəyişdirilməsi, eyni zamanda digər aqreqatların təmir edilməsindən sonra ölkədəki bütün altı ədəd modul tipli elektrik stansiyalarının hamısında yenidənqurma, təmir və bərpa işləri başa çatıb. 

Nəticədə, “Səngəçal” Elektrik Stansiyasında 95 MVt, “Bakı” Elektrik Stansiyasında 20 MVt, “Şahdağ” Elektrik Stansiyasında 15 MVt, “Xaçmaz” Elektrik Stansiyasında 47 MVt, “Astara” Elektrik Stansiyasında 40 MVt, “Şəki” Elektrik Stansiyasında isə 39 MVt olmaqla, ümumilikdə 256 meqavat “itirilmiş” güc bərpa olunub.