Türkiyəli “Bürünc adam”: “Azərbaycanla aramızda səmimi mühit var”
Türkiyə millisinin yunan-Roma güləşi üzrə Olimpiya, dünya və Avropa mükafatçısı Cenk İldəm Azərbaycan yığması ilə birgə təlim-məşq toplanışı keçməyin faydasından danışıb.
“Anadolu” agentliyinə danışan “Bürünc adam” ləqəbli (bir Olimpiada, üç dünya çempionatı, dörd Avropa çempionatı və Bakıda keçirilmiş I Avropa Oyunlarında bürünc medal qazanıb – S.M.), 35 yaşlı idmançı fikirlərini belə ifadə edib:
“Qardaş ölkə Azərbaycan dünya güləşində özünü sübut etmiş bir milli komandadır. Biz də eləyik. Birgə təlim-məşq toplanışları çox faydalı olur. Azərbaycanla aramızda səmimi mühit var. Ora gedəndə bizi öz vətəndaşları kimi qarşılayırlar. Dünya və Avropa çempionatlarında medal qazanmış çoxlu idmançıları var”.
Qeyd edək ki, yunan-Roma güləşi üzrə millimiz yanvarın 5-dən İstanbulun Sarıyer bölgəsində Türkiyə yığması ilə birgə təlim-məşq toplanışı keçir. Sabah Türkiyə toplanışını başa vuracaq komandamız oradan Fransanın Nitsa şəhərində keçiriləcək Anri Deqlanın şərəfinə keçirilən ənənəvi Qran Priyə qatılacaq.
Son yazılar
