ABŞ-da şagirdlər “vətəndaş fəallığı”nı göstərmək üçün məktəbə getməyəcəklər

ABŞ-ın Virciniya ştatında məktəblilərə etiraz aksiyalarında iştirak etmək üçün ildə bir gün dərsləri buraxmağa icazə veriləcək.

Bu barədə “Washington Post” nəşri məlumat verir.

Yeni qayda Ferfaks dairəsində 2020-ci ilin yanvarın 27-dən qüvvəyə minəcək. Qaydaya əsasən, şagirdlər yeddinci və daha yuxarı siniflərdən başlayaraq “vətəndaş fəallığı”nı nümayiş etdirmək üçün ildə bir dəfə məktəbə gəlməyə bilərlər. İdeyanın təşəbbüskarlarının fikrincə, bu, yeniyetmələrə marşlarda və oturaq tətillərdə iştirak etməyə imkan verəcək.

Məktəblilər öz planları haqqında tədris mərkəzinin administrasiyasına aksiyada iştirak etməmişdən iki gün öncə xəbər verməli olacaqlar. Yeniyetmələr, həmçinin valideynləri və qəyyumlarından da icazə almalıdırlar. Bildirilir ki, yeni qaydaya əsasən, məktəb şagirdlərə tətildə iştirak etməyə qadağa qoya bilməz.