Ötən gecə sosial şəbəkələrdə Salyan rayonunda, Xələc və Qarabağlı kəndləri arasındakı çöllükdə təcili tibbi yardım avtomobilinin yolda qalmasını əks etdirən şəkillər paylaşılıb. Qeyd olunub ki, avtomobil gecə saatlarında, çağırışa gedən zaman xarab olub.

Baş vermiş hadisə ilə bağlı Bakunews.media Tibbi Ərazi Bölmələrini İdarəetmə Birliyinə (TƏBİB) sorğu ünvanlayıb. Qurumun İctimaiyyətlə Əlaqələr və Marketinq Departamentinin rəhbəri Zamirə Ədilova Bakunews.media-ın sorğusuna cavab olaraq bildirib ki, təcili tibbi yardım avtomobili texniki nasazlıq səbəbindən yolda qalıb:

“Salyan rayonunun Qarabağlı kəndinə çağırışa yollanan təcili tibbi yardım avtomobilində texniki nasazlıq qeydə alınıb. Təcili tibbi yardım avtomobilindəki briqadaya kömək məqsədilə texniki işçilər cəlb olunublar. Çağırış ünvanına isə digər təcili tibbi yardım avtomobili yönləndirilib”.

Z.Adilova çağırış ünvanındakı xəstənin vəziyyətinin ağır qiymətləndirildiyini də diqqətə çatdırıb:

“Qarabağlı kənd sakini, 1942-ci il təvəllüdlü (qadın cinsli) şəxs Salyan Rayon Mərkəzi Xəstəxanasına hospitalizasiya olunub. Pnevmoniya diaqnozu ilə ona zəruri tibbi xidmət göstərilir. Vəziyyəti ağır qiymətləndirilir”.

Əzizə İsmayılova