MDB Baş Qərargah Rəisləri Komitəsinin iclasında əməkdaşlığın inkişafına dair sənədlər imzalanıb

MDB ölkələrinin Silahlı Qüvvələrinin Baş Qərargah Rəisləri Komitəsinin Moskvada keçirilən iclasının yekunları üzrə əməkdaşlığın inkişafına dair sənədlər imzalanıb.

Bu barədə MDB İcraiyyə Komitəsindən məlumat verilib.

Görüş zamanı regional sabitliyə və dövlətlərin milli təhlükəsizliyinə, qoşunların döyüş və səhra hazırlığının səviyyəsinin yüksəldilməsi, hərbi qulluqçuların hərbi-peşə hazırlığı məsələlərinə diqqət yetirilib.

Baş qərargah rəisləri müasir şəraitdə döyüş əməliyyatlarının aparılması təcrübəsinin qoşunların əməliyyat və döyüş hazırlığı təcrübəsinə tətbiq etməklə bağlı yanaşmaları dəstəkləyiblər.

“Görüşün nəticəsində milli və ümumi maraqlar nəzərə alınmaqla hərbi sahədə çoxtərəfli əməkdaşlıq sisteminin daha da inkişaf etdirilməsi ilə bağlı qərarlar imzalanıb”, - məlumatda bildirilib.

İclasda Azərbaycan müdafiə nazirinin birinci müavini - Azərbaycan Ordusunun Baş Qərargah rəisi general-polkovnik Kərim Vəliyevin rəhbərlik etdiyi Azərbaycan nümayəndə heyəti də iştirak edib.