Azərbaycanlı Əməkdar məşqçi: “Maşınıma spirt qoymuşam, maska da taxıram”
“İşlədiyim “Sabah” klubunda bütün məşqlər martın 15-dən dayandırılıb. Bu səbəbdən futbolçular məşqlərə gəlmir. Mən də işlə bağlı bəzən Akademiyaya baş çəkirəm”.
Bunu Bakunews.media-a “Sabah” Futbol Akademiyasının koordinatoru Təbriz Həsənov bildirib.
O qeyd edib ki, koronavirusla bağlı preventiv tədbirləri ev şəraitində görür:
“İki övladım var. Hər ikisi tələbədir. Universitetlər bağlandığı üçün onlar çox yerə getmirlər. Maşınımda spirt var. Əllərimizi spirtlə tez-tez təmizləyirik. Evdən bayıra çıxanda qoruyucu maskadan istifadə edirik. İnsanlar artıq virusun təhlükəsini hiss etdiyindən, əvvəlki tək maskadan istifadə edənlərə pis baxmırlar”.
Yeri gəlmişkən, martın 4-də Gənclər və İdman Nazirliyi tərəfindən Əməkdar məşqçi adını alan T.Həsənov bu məsələyə də münasibət bildirib:
“52 yaşımda bu ada yiyələndim. Düşünmürəm ki, gec yaşda Əməkdar məşqçi oldum. Əksinə, yaxşı vaxtımda bu ada sahib çıxdım. Məni bu fəxri ada layiq görənlərə təşəkkürümü bildirirəm”.
Səbuhi Musayev