Bu il Xocalı faciəsinin 32-ci ildönümüdür. Bununla əlaqədar paytaxtın Xətai rayonundakı “Ana harayı” abidəsinin yerləşdiyi parkda hazırlıq işləri sürətlə davam etdirilir.

Bakunews.media xatırladır ki, 1992-ci il fevralın 25-dən 26-na keçən gecə erməni hərbi birləşmələri keçmiş SSRİ ordusunun 366-cı motoatıcı alayının köməyi ilə Xocalı şəhərinə hücum edib.

Şəhərin 2 500 sakini xilas olmaq üçün Ağdam istiqamətində hərəkət edib. Ermənilər isə dinc sakinləri gülləbaran ediblər.

Erməni təcavüzkarlarının Azərbaycan xalqına qarşı törətdikləri növbəti kütləvi qırğın 613 nəfərin, o cümlədən 106 qadın, 63 uşaq, 70 qocanın həyatına son qoyub. 1 275 dinc sakin əsir götürülüb, onlardan 150 nəfərin taleyi hələ də məlum deyil. 475 nəfər şikəst olub. Səkkiz ailə bütünlüklə məhv edilib. 25 uşaq hər iki valideynini, 130 uşaq isə valideynlərindən birini itirib.

Xocalı qətliamı Ermənistanın uzun illərdən bəri Azərbaycana qarşı həyata keçirdiyi planlaşdırılmış etnik təmizləmə və təcavüz siyasətinin tərkib hissəsi idi. Soyqırımının törədilməsinə görə Ermənistanın ozamankı siyasi-hərbi rəhbərliyi məsuliyyət daşıyır.

Hər il fevralın 26-da Azərbaycan xalqı o qanlı gecədə şəhid olan soydaşlarımızın əziz xatirəsini “Ana harayı” abidəsini ziyarət edərək yada salır. Hazırda abidənin ətrafında təmizlik və abadlıq işləri aparılır.

Daha çox foto burada: PhotoStock.az