Rusiyalı politoloq, SONAR-2050 analitik layihəsinin baş redaktoru Semyon Uralov Caliber.Az-a Ermənistan-Azərbaycan sərhədindəki vəziyyəti şərh edib.

O, Ermənistanda Qarabağ iddialarından qəti şəkildə imtina etməsi ilə əlaqəli yaranan yeni etiraz dalğasına münasibət bildirib:

“Məgər, Ermənistan nə vaxtsa Qarabağı tanıyıb? Bir şeydən imtina etmək üçün əvvəl ona sahib olmalı və ya onu tanımalısan. Qarabağ nə indiki, nə də keçmiş vəziyyətində İrəvan tərfindən tanınmayıb. Ona görə də, bir daha təkrarlayıram, tanımadığınız bir şeydən necə imtina edə bilərsiniz?”

Politoloq eyni zamanda, Ermənistanın bütün üçtərəfli razılaşmalardan imtina etməsi ehtimalı barədə müxalif siyasətçilərin fikirlərinə də münasibət bildirib:

“Ermənistandakı müxalifət seçkiləri qazansa belə, Baş nazir vəzifəsini konkret bir şəxs tutacaq. Əgər bu şəxs gərginləşmə yolu ilə gedərək siyasi xal qazanmaq üçün hər cür açıqlama verə bilər. Ancaq bölgədəki sabitliyin qarantı Rusiyadır və İrəvan yalnız Moskvaya arxalana bilər. ABŞ, Fransa və digər ölkələrdəki erməni lobbisi əslində bir şey edə bilmədi. Ona görə də, erməni tərəfi Moskvanı dinləməli olacaq. Rusiya isə münaqişənin həllinə yönəlmiş dəqiq bir mövqe tutub. Və İrəvan Moskva ilə birbaşa münaqişəyə getməyəcək”.