Bu gün Xalq yazıçısı Maqsud İbrahimbəyovun doğum günüdür.

Bakunews.media xatırladır ki, görkəmli yazıçı və parlaq şəxsiyyət Maqsud İbrahimbəyov 1935-ci il mayın 11-də Bakı şəhərində anadan olub.

Orta məktəbi bitirdikdən sonra o, 1955-1960-cı illərdə Azərbaycan Politexnik İnstitutunun (indiki Azərbaycan Texniki Universiteti - red.) İnşaat Fakültəsində ali təhsil alıb, 1962-1964-cü illərdə Moskvada Ali ssenari kurslarında, 1971-1973-cü illərdə isə Ali rejissor kurslarında oxuyub.

Əmək fəaliyyətinə 1960-cı ildə Azərbaycan Tikinti Nazirliyinin Ağır Sənaye İnşaatı Trestində mühəndis kimi başlayan Maqsud İbrahimbəyov sonralar burada müxtəlif vəzifələrdə çalışıb, 1964-1971-ci illərdə SSRİ Mərkəzi Televiziya və Radio Verilişləri Komitəsində Azərbaycan üzrə xüsusi müxbir işləyib. Sonrakı illərdə o, bədii yaradıcılıqla və ictimai fəaliyyətlə məşğul olub.

Nasir, dramaturq, kinossenarist və rejissor kimi çoxcəhətli fəaliyyəti ilə SSRİ miqyasında tanınıb. Onun “Mezozoy əhvalatı” pyesi Mədəniyyət Nazirliyinin keçirdiyi ən yaxşı pyeslər müsabiqəsində birinci yeri tutub. ”Mezozoy əhvalatı”, “Bayquş gəlmişdi”, “Yay tətili”, “Bütün yaxşılıqlar üçün - ölüm!”, “Truskavetsə kim gedir?”, “Sən nəğməmsən mənim”, “Ona görə ki, mən Ayvar Lidakam” və s. ssenariləri əsasında filmlər çəkilib.

“Qəza”, “Bir az da sevinc”, “Eşitmədiyim mahnı”, “Qoy o bizimlə qalsın” və s. adlı kitabları Moskva nəşriyyatlarında kütləvi tirajla buraxılıb. Əsərləri keçmiş SSRİ və xarici ölkə xalqlarının dillərinə tərcümə olunub. “Bayquş gəlmişdi” və “Bütün yaxşılıqlar üçün - ölüm!” əsərlərinə görə ona 1976-cı ildə Azərbaycan SSR Dövlət mükafatı verilib.

“Azərbaycan PEN-Klubu”nun (beynəlxalq yazıçılar təşkilatının) sədri olub. 1991-ci ildə Azərbaycan Yazıçılar Birliyi katibliyi heyətinə (Beynəlxalq əlaqələr üzrə katib) seçilib. ABŞ-nin Luiziana ştatının fəxri senatoru və Minneapolis şəhərinin fəxri vətəndaşı seçilib.

Maqsud İbrahimbəyovun adını daşıyan mərkəz bir çox müxtəlif tədbirlər, yeni kitabların nəşrini həyata keçirib və “Püstə ağacı” hekayəsi əsasında tamaşanı səhnəyə qoyub.

Maqsud İbrahimbəyov 22 mart 2016-cı ildə Bakı şəhərində gecə saatlarında vəfat edib, Birinci Fəxri xiyabanda dəfn edilib.