Qapalı məkanda siqaret çəkən şəxslər CƏZALANDIRILDILAR

Qazaxda ictimai qaydanı pozan şəxslər məsuliyyətə cəlb olunub.

Bu barədə Daxili İşlər Nazirliyinin Mətbuat Xidməti məlumat yayıb.

Bildirilib ki, Qazax Rayon Polis Şöbəsinin əməkdaşları tərəfindən rayon ərazisində yerləşən kafe, restoran və digər iaşə obyektlərində keçirilən tədbirlər zamanı qapalı məkanlarda siqaret çəkən, eləcə də tütün məmulatı tullantılarını ətrafa atan şəxslər müəyyən olunublar. Həmin şəxslərlə profilaktiki söhbətlər aparılıb və 10 nəfər barəsində inzibati protokol tərtib olunub.

Bundan başqa sanitariya-gigiyena qaydalarının pozulması hallarının qarşısının alınması, ətraf mühitin mühafizəsinin təmini məqsədilə də tədbirlər keçirilib. Rayon ərazisində sənaye və məişət tullantılarının qalaqlanması, eləcə də yandırılması zamanı ətraf mühitin mühafizəsi tələblərinə əməl edilməməsi faktları aşkar olunub. Qaydalara əməl etməyən 6 nəfər inzibati məsuliyyətə cəlb olunub.

Müxtəlif sahələrdə davam etdirilən monitorinqlər zamanı qanunsuz küçə ticarəti və avaralıqla məşğul olan, eləcə də mülki silahların saxlanma qaydasını pozduğuna 10 nəfər inzibati məsuliyyətə cəlb olunub.